د پوهنې وزارت د معیاري آزموینو او د ښوونیزو پایلو ارزونې ریاست پلاوي، د هېواد یو شمېر ولایتونو ته رسمي سفر وکړ
د پوهنې وزارت د معیاري آزموینو او د ښوونیزو پایلو ارزونې ریاست اړوند د ۴۲ تنو کارپوهانو، متخصصینو او علمي غړو ګډ پلاوي، خوست، کاپیسا، نورستان، هرات، سمنګان او بلخ ولایتونو ته د خپل سفر په ترڅ کې، د ښوونځیو د درېیمو ټولګيو د زده کوونکو تعلیمي کچه و ارزوله او د شپږم ټولګي د څلور نیم میاشتنو آزموینو پایلې یې هم وڅارلې.
د دغو سفرونو په ترڅ کې پلاوي د يادو ولايتونو د پوهنې رياستونو له رئيسانو او يو شمېر نورو مسئولينو سره وکتل او د ښوونکو تدریسي کيفيت او د زده کوونکو د ښوونیزې کچې د لوړوالي په اړه يې د علاقې وړ موضوعاتو په اړه مفصلې خبرې وکړې.
له بلې خوا د يادو ولايتونو د پوهنې رئيسانو د دغه پلاوي له سفر څخه د خوښۍ په څرګندولو سره ژمنه وکړه، چې له زده کوونکو څخه د آزموينې اخيستلو د لارښوونو د پلي کولو او د هغوى د څارنې په برخه کې به له پلاوي سره هراړخیزه همکاري وکړي.
