د ولایتونو د پوهنې ریاستونو کارکوونکو ته د وړتیا لوړونې سیمینار پیل شو
په هغه غونډه کې چې د پوهنې وزارت د مرکزي او ولایتي ریاستونو د مسلکي غړو د کړنو لاښه والي په موخه د وړتیا لوړونې سیمینار د پیل په مناسبت جوړه شوې وه، د پوهنې وزارت د سرچینو او ادارې معین الحاج مولوي صبغت الله وصیل، د یاد وزرات د ادارې عمومي ریاست مرکزي رئیسانو او روزونکو ګډون درلود.
په پيل کې د پوهنې وزارت اداري لوی رئیس مفتي محمد یوسف ثاقب ګډون والو ته ښه راغلاست ووایه او د یاد سیمینار موخې یې هغوی ته تشرېح کړې.
نوموړي څرګنده کړه: اخلاص او د کارکوونکو د مسلکي وړتیا لوړول په ادارو کې د چارو د لاپرمختګ لامل ګرځي.
ورپسې د سرچینو او ادارې معین هم د کارکوونکو د وړتیا لوړونې په ارزښت خبرې وکړې او زیاته یې کړه: د یوې ادارې پیاوړتیا او روڼتیا د هېواد او خلکو په خدمت کولو او د کارکوونکو په پاک نیت کې ده.
د يادونې وړ ده، دغه درې ورځنی پروګرام د پوهنې وزارت د تشکیلاتو رياست له خوا د مرکز او ولايتونو د پوهنې رياستونو د شاوخوا ۷۲ تنو کارکوونکو د مسلکي ظرفیتونو لوړولو په موخه جوړ شوی، چې په ترڅ کې به یې هغوی ته د ښوونیزو اړتیاوو ارزونې، د وخت مدیریت، پلان جوړونې، راپور ورکولو، همغږۍ او ارتباط برخه کې روزنه ورکړل شي.
