د پوهنې وزارت د ښوونې او روزنې معین د پکتیکا ولایت د سرحدي ولسوالیو پوهنیز وضعیت وارزاوه
د پوهنې وزارت د ښوونې او روزنې معین الحاج مولوي سخاءالله سعید او ورسره مل پلاوي، په داسې حال کې چې د پکتیکا ولایت پوهنې رئیس مولوي عبدالوکیل خالد یې هم ملتیا کوله، د دغه ولایت شکین ولسوالۍ ته ولاړ او هلته یې له پوهنې آمر، د مدارسو او ښوونځیو مسئولینو، د علماوو شورا رئیس او قومي مشرانو سره وکتل او د همدغې ولسوالۍ د پوهنې وضعیت په اړه یې ورسره خبرې وکړې.
په یاده کتنه کې د پوهنې سیمه ییزو مسئولینو د خپلې سیمې د ښوونیزو بنسټونو او د مسلکي ښوونکو کمښت په ګډون یو لړ وړاندیزونه او ستونزې د پوهنې وزارت له مشرتابه سره شریکې کړې، چې د یاد وزارت معین له لوري ورسره دستونزو په حل کې د همکارۍ ژمنه وشوه.
