له ولایتونو څخه د پوهنې لنډ راپورونه
ننګرهار
د ایراني قونسل پلاوي په داسې حال کې چې د پوهنې ریاست مسئولینو او د یاد ولایت د بهرنیو اړیکو رئیس مولوي فضل هادي احمد یې ملتیا کوله، د ننګرهار خوګیاڼو ولسوالۍ ته د یوه رسمي سفر په ترڅ کې، د پوهنې له رئیس او نورو مسؤلینو سره وکتل او د يادې ولسوالۍ د پوهنې وضعيت د ښه والي په اړه یې تفصیلي خبرې وکړې.
یاد پلاوي د خپل سفر په دوام، د يو شمېر ښوونځيو له ښوونکو او زده کوونکو سره هم وکتل او ژمنه يې وکړه، چې د يادې ولسوالۍ د ښوونځيو په جوړولو کې به د پوهنې له رياست سره جدي همکاري وکړي.
د یو بل خبر له مخې:
د ننګرهار پوهنې ریاست د یاد ولایت د امنیتي ځواکونو په همکارۍ د زرغونې انا، خالد بن ولید او بېټ نیکه د ښوونځیو غصب شوې ځمکې چې پخوا د یو شمېر خلکو له خوا غصب شوې وې، بېرته را وګرځولې او د پوهنې د ملکیت په توګه یې ثبت کړې.
زابل
د زابل ولایت پوهنې رئیس الحاج مولوي ګل ولي د یاد ریاست له مسئولینو سره د لیدنې پر مهال، له کارکوونکو وغوښتل، چې د خپلو ورځنیو چارو د لا ښه والي لپاره، د نظم او اداري چارو په تطبیق کې د آمرینو اطاعت ته جدي پاملرنه وکړي.
نورستان
د نورستان ولايت پوهنې رئیس مولوي تاج محمد مطمئن د یاد رياست له کارکوونکو وغوښتل، چې خپل کاري مسئوليتونه درک کړي او د ورسپارل شويو دندو د مؤثريت په لاره کې جدي هلې ځلې وکړي.
دایکنډي
د دايکنډي ولايت د امربالمعروف او نهی عن المنکر رياست محتسبینو د یاد ولايت د پوهنې رياست له رئیس او مرکزي کارکوونکو سره وکتل او له هغوى سره يې د تقوا، ښو اخلاقو، صورت،سیرت او اسلامي حجاب په اړه خبرې وکړې.
