لوګر کې د هلکانو یوه لومړني ښوونځي ته ودانۍ جوړه شوه
پوهنې وزارت، لوګر: د لوګر ولایت څرخ ولسوالۍ کې د شهید غلام محمد د هلکانو لومړني ښوونځي ته جوړه ودانۍ ګټې اخیستنې ته وسپارل شوه.
د یاد ښوونځي پرانیستغونډه کې د پوهنې ریاست د استازو تر څنګ د نوموړي کلي یو شمېر دیني عالمانو او قومي مشرانو هم برخه اخیستې وه.
د یادې ښوونځی ودانۍ د اقراء پروګرام په مالي مرسته د شاوخوا ۴،۶ میلیونه افغانیو په لګښت په پاخه او اساسي ډول جوړه شوې، چې ۶ ټولګي، یوه اداري خونه، د لمریزې برېښنا سیستم، لمریز واټر پمپ، د اوبو څاه او درې غرفې تشنابونه لري.
د شهید غلام محمد د هلکانو لومړنی ښوونځی نهه کاله مخکې فعال شوی، چې اوس مهال نيږدې دوه سوه زده کوونکي لري.
د لوګر ولایت د پوهنې رئیس سید عزیز احمد هاشمي د دښت کلي له اوسېدونکو څخه غواړي، چې د ښوونځي د ودانۍ په ساتلو او ښوونځي ته د ماشومانو په لېږلو کې هلې ځلې وکړي.
د یادونې وړده، چې په لوګر کې له دې مخکې هم د اقراء پروګرام له لارې ځینې نور جوړ شوي ښوونځي ګټې اخیستنې سپارل شوي دي.
