په کندهار کې د ښځينه زده کوونکو لپاره افغان – ترک ښوونځۍ پرانيستل شوه
د کندهار د مرکز اړوند د عینو مینې په ښار ګوتي کې د ښځينه زده کوونکو لپاره د ترکیې هیواد لخوا افغان – ترک ښوونځۍ په داسي حال کې چې د کندهار والي حيات الله حيات، د ترکيې هيواد سفير ( اوغوزان ارتوګرول ) او ورسره راغلي پلاوي، د سولي او منازعاتو د حل د مرکز مشر حکمت خليل کرزي ، د پوهني ریس عبدالقادر پیوستون ، د يو شمېر دولتي ادارو مسؤلينو، ملي سوداګرو، ځوانانو او د زده کوونکو د والدينو د کمېټې غړو ګډون درلود، د پتې په پریکولو سره رسمآ پرانیستل شوه .
په همدې تړاو جوړه شوې غونډه کې ، دکندهار والي د دغه ښوونځۍ په پرانيستلو سره د کندهار ټول ولس ته مبارکي وويل او ترڅنګ يې د ترکيې هيواد د پوهني له مسؤلينو څخه مننه وکړه ، چي په کندهار کي يې د هلکانو ترڅنګ د ښځينه وو لپاره هم د معياري زده کړي زمينه برابره کړې.
دغه راز په مراسمو کي د ياد هيواد سفير ( اوغوزان ارتوګرول ) هم د خپلو خبرو پرمهال ډاډ وښود، چي لا به هم د افغان بچيانو په تعليمي برخه کي هڅه کوي ترڅو هغوئ ته لازمي اسانتياوي رامنځته کړي.
نوموړي زياته کړه، چي په راتلونکي کي به په کندهار کي د کانکور د امادګيو لپاره هم زمينه برابره کړي، څو کندهاري زده کوونکي په لوړو نمرو سره د خپلو خوښو پوهنځيو ته لاري ومومي.
