د نیکمرغه کوچني اختر د راسېدو په مناسبت د پوهنې سرپرست وزیر ډاکټر محمد میرویس بلخي د مبارکۍ پیغام
خوښ یم، چې د نیکمرغه کوچني اختر د را رسېدو او د دغه سپیڅلې ورځې په ویاړ د افغانستان د اسلامي جمهوري دولت د رهبرۍ هیئت، د معارف لويي کورنۍ او دافغانستان سر لوړِي اوستر ملت ته خپل د زړه له کومي مبارکي وایم.
کوچنی اختر د ښه نیت اخلاص، ریښتینولۍ، ژمنې ته د وفادارۍ او پیوستون نښه ده چې مسلمانان وروسته له یوې میاشتې ریاضت او ریښتینې بنده ګۍ دا فرصت په لاس راوړي چې خوښي وکړي او دپاک الله د نعمتونو شکر ادأ کړي.
هیله من یم، چې د معنویت په دې پسرلي کې د افغانستان د خلکو په منځ کې د عقلانیت او اعتدال او اخلاقي ارزښتونو په رڼا کې د برابرۍ او ورورګلوۍ د ټینګیدو او تقویه کیدو شاهدان و اوسو نن ورځ په زرګونو ځوانان او ماشومان د زده کړې له خدماتو څخه لرې پاتې شوې دي، چې لامل یې یواځې د دوی په سیمو کې د جګړې او امنیت نشتوالی دی دا حالت د دې لامل شوی، چې علم او پوهه ونه توانیږي ترڅو په جهل او نادانۍ باندې برلاسې شي او د افغانستان دځوانانو د راتلونکي ژوند مسیر له تورو تیارو څخه د خوشبختۍ د رڼا ګانو په لور رهنمايي کړي هیله من یم، چې د روژې د مبارکې میاشتې او کوچنې اختر د را رسیدو په برکت د جګړې ښکیل لوري په دې خبره سره صلاح شي، چې نور په هیواد کې د وژنو خبرابیدو او تباهۍ شاهدان ونه اوسو.
یو ځل بیا د کوچني اختر د را رسیدو په ویاړ تاسو ته مبارکي وایم او د بښوونکي رب له دربار څخه هیله من یم چې دغه نیکمرغه ورځې زموږ هیوادوالو ته دخوشحالۍ او سوکالۍ څخه ډکې ورګرځوي او زموږ ګران هیواد افغانستان یوې دایمي سولې او سراسري ثبات ته ورسوي.
په درنښت
ډاکټر محمد میرویس بلخي
د پوهنې وزارت سرپرست وزیر
