د لوګر په ۱۵۰ ښوونځیو کې د حی علی الفلاح په نوم دیني سیالۍ پیل شوې
د لوګر د مرکز او ولسوالیو په ۱۵۰ دولتي او خصوصي ښوونځیو کې د حی علی الفلاح په نوم دیني سیالۍ په لاره واچول شوې.
د یادو دیني سیالیو په پیل غونډه کې، چې د لوګر نوین په خصوصي ښوونځي کې جوړه شوې وه د پوهنې رئیس عبدالوکیل کلیوال د دې لېسې مدیر محمد نسیم عباسي او یو شمېر خبریالانو برخه اخیستې وه.
د لوګر د پوهنې رئیس عبدالوکیل کلیوال د دغو دیني سیالیو پر جوړولو خوښي څرګنده کړه او د دا ډول سیالیو جوړول یې د زده کوونکو د فکري ودې او استعدادونو د غوړولو په برخه کې مهم کار وباله.
د پوهنې رئیس وویل،چې په را روانه اوونۍ کې به د مرکز او ولسوالیو د پاتې ښوونځیو د زده کوونکو تر منځ ورته نورې سیالۍ هم جوړې شي.
دغه دیني سیالۍ د پوهنې ریاست په نوښت د لوګر نوین د خصوصي لېسې په مالي مرسته پر لاره اچول شوي ، چې د روژې مبارکې میاشتې تر ۲۷ مې نېټې به دوام وکړي.
په دغو سیالیو کې د ۵۰۰ نجونو په ګډون ۲۵۰۰ زده کوونکو برخه اخیستې ده، چې له سیالیو څخه موخه د روژې مبارکې میاشتې درناوی او د خوږ نبي اکرم ﷺ د سیرت پېژندل دي.
یادې سیالۍ د ازموینې په بڼه دي، چې پایلې به یې د یوې لویې غونډې په ترڅ کې اعلان شي او د لوړو نومرو اخیستونکي زده کوونکي به په کې وستایل شي.
د یادونې وړده، چې په تېروکلونو کې هم د لوګر د دولتي او خصوصي ښوونځیو د زده کوونکو تر منځ ورته سیالۍ جوړې شوي دي.
