په کابل ښار کې د ښوونځیو د سپورټي لوبډلو ترمنځ د منډې وهلو سیالۍ ترسره شوې
د زمري د ۲۴مې ورځې (د افغانستان اسلامي ا.مارت د بریا په مناسبت) د پوهنې وزارت د اساسي او ثانوي زده کړو ریاست د بدنی روزنې آمریت پروګرام له مخې، د کابل ښار د ۲۰ بابه لېسو د ۲۰۰ تنو زدهکوونکو ترمنځ د سپورټ ( منډې وهلو) سیالۍ ترسره شوې.
یادې سیالۍ چې واټن یې شاوخوا ۵ کیلومتره ( له دارالامان ماڼۍ څخه تر حبیبیې عالي لېسې پورې ټاکل شوی و.) په پایله کې یې د عبدالعلي مستغني عالي لېسې څخه احمد بلاح وکولی شول چې لومړی مقام وګټي او د ذبېح الله شهید عالي لېسې څخه آرین او شفق الله او د شمس المشایخ عالي لېسې څخه مدثر په ترتیب سره له دویم څخه تر څلورم مقامونه ترلاسه کړل.
د سیالۍ ګټونکي زدهکوونکي د پوهنې وزارت د چارواکو لخوا د سپورټي کپونو او ډالیو په ورکولو سره وستایل شول.
