سمنګان ولایت کې د ۲۱ مېلیونه افغانیو په لګښت د یو شمېر ښوونځيو د ودانیو رغونې او ترمیم پروژې پیل شوې
په سمنګان ولایت کې د تدریسي ودانیو، شاوخوا دېوالونو او د یو شمېر ښوونځیو بیارغونې پروژو د بنسټ ډبرې، د یو لړ مراسمو په ترڅ کې، د پوهنې رئیس او چارواکو، ځینو سیمه ییزو مسئولینو، دیني علماءکرامو او قومي مشرانو په ګډون سره د فیروزنخچیر ولسوالۍ اړوند په تنګي لومړني ښوونځي کې د ډبرې په اېښودلو سره پیل شوې.
په یادو مراسمو کې، د سمنګان ولایت پوهنې رئیس محترم مولوي محراب الدین اقبال، د پوهنې پر اهمیت او د ښوونیز کیفیت په لوړولو کې د تدریسي زیربناوو رول په اړه هراړخیزه وینا وکړه.
د یادونې وړ ده چې: پورته ذکر شوې پروژې د یوې تعلیمي ملاتړې ادارې په مالي مرسته پلې کېږي، چې ټول لګښت یې ۲۱ مېلیونه ۴۱۹ زره ۵۵۸ افغانۍ اټکل شوی دی.
هغه پروژې چې د یاد ولایت په مرکز ایبک او د فیروز نخچیر، خرم - سرباغ، روی دوآب، دره صوف بالا، دره صوف پاین ولسوالیو کې پلې کېږي، په لاندې ډول دي:
- د فیروز نخچیر ولسوالۍ کې د درېیو ټولګيو لرونکې ودانۍ جوړول.
- د خرم او سرباغ ولسوالیو کې د ښوونځي د احاطوي دېوال جوړول.
- په موهو ښوونځي کې د درېیو ټولګيو جوړول او د روی دوآب ولسوالۍ کې د منځني ښوونځي بیارغونه.
- په دره صوف پاین ولسوالۍ کې د بیانان شرق عالي لېسې لپاره د استنادي دېوال جوړول.
- د شیخه ښوونځي لپاره د احاطوي دېوال جوړول او د دره صوف بالا ولسوالۍ خاکباد ښوونځي کې د پنځه خونو لرونکې ودانۍ جوړول او بیارغونه.
- د کته قشلاق لومړني ښوونځي لپاره احاطوي دېوال جوړول او د مرکز ایبک اړوند د حاجي امان الله قندهاري ښوونځي لپاره د څښاک پاکو اوبو شبکې فعالول.
د پوهنې وزارت مشرتابه، په داسې حال کې چې د پوهنې سره د همکارو ادارو له ملاتړ ستاینه کوي، د هېواد د تعلیمي ادارو له زدهکوونکو او چارواکو څخه غواړي چې د خپلو ښوونځیو تجهیزاتو او تاسیساتو ساتنې او ترمیم ته جدي پاملرنه وکړي.
