سرپل ولایت کې څه د پاسه ۵۰۰ زره ډالرو په لګښت د ۶۴ بابه ښوونځیو بیارغونې پروژې منظور شوې
د پوهنې وزارت سرپرست الحاج مولوي حبیب الله آغا د سرپل ولایت پوهنې رئیس مولوي محمد رحماني سره په لیدنه کې، په سرپل ولایت کې د هغو ۶۴ بابه ښوونځیو د ترمیم او بیارغونې پروژې منظور کړې، کوم چې لګښت یې ۵۱۲ زره ډالر اټکل شوی او د یو ملاتړ کوونکي بنسټ له لوري تمویلېږي.
په ورته مهال، د سرپل ولایت پوهنې رئیس مولوي محمد رحماني د پوهنې وزارت مشرتابه ته د یاد ولایت د ښوونیز او روزنیز وضعیت په اړه راپور وړاندې کړ، چې د وزارت مشرتابه لخوا د پوهنې لاښه والي لپاره د ترسره شویو فعالیتونو لپاره ارزښتناک وګڼل شو.
د یادولو وړ ده چې د همدغو پروژو په پلي کېدو سره به د پورته ذکر شویو ښوونځیو ټولګي، دروازې او د ودانیو نورې اړینې برخې بیاورغول شي.
