د ۱۴۰۴ لمریز کال لپاره د پوهنې وزارت د بودیجې کمېټې غونډه جوړه شوه
د پوهنې وزارت د بودیجې کمېټې غونډه، د یاد وزارت د سرچینو او ادارې د معین الحاج مولوي صبغت الله وصیل په مشرۍ په داسې حال کې جوړه شوه، چې پکې د پوهنې وزارت د مقام د دفتر لوی ریاست یو شمېر رئیسانو او استازو هم حضور درلود.
د غونډې ګډون والو ترمنځ د معینیتونو او ریاستونو د هغو وړاندیزونو او پلانونو په اړه چې د بودیجې د ټاکلو لپاره یې درلودل، هر اړخیز بحثونه ترسره او د هرې ادارې په اړه لازمې پرېکړې وشوې.
همدارنګه د پوهنې وزارت د اسلامي زده کړو، ښوونې او روزنې معینیتونو سربېره، د نشراتو او عامه اړيکو رياست له استازو څخه يوه ګډه کمېټه جوړه شوه، چې د راتلونکي ښوونیز کال لپاره د مدارسو او ښوونځيو د زده کوونکو لپاره د درسي کتابونو اړتياوې وڅېړي او اړوند راپور دې راتلونکې غونډې ته وړاندې کړي.
