لوګر ولایت کې د ۱۵۵ مېلیونه افغانیو په لګښت د ۱۴ بابه ښوونځیو رغولو چارې د پای ته رسېدلو په درشل کې دي
د لوګر ولایت مرکز پل علم ښار سربېره په خروار، بره کي برک، محمدآغې او چرخ ولسوالیو کې د ۱۴ بابه ښوونځیو د ودانیو رغنیزې چارې، چې شاوخوا ۸ میاشتې وړاندې د پوهنې د ملاتړو بنسټونو په همکارۍ د ۱۵۵ مېلیونه افغانیو په لګښت پیل شوې وې؛ اوسمهال د پرانیستلو په درشل کې دي.
د پوهنې مسئولينو په وينا، د يادو پروژو په پرانیستلو سره به څه باندې ۲۰ زره تنو زده کوونکو ته چې په آزاده فضا کې زده کړې کوي، د زده کړې مناسب ښوونیز چاپېريال برابر شي.
په ورته مهال لوګر ولایت کې د تېرو دریو میاشتو راهیسې د ۵۷ مېلیونه افغانیو په لګښت ۱۹ ښوونیزې پروژې په رسمي ډول پرانیستل شوې او ګټې اخیستنې ته سپارل شوې دي.
