د پوهنې په برخه کې د میدان وردګ ولایت د خلکو مالي مرستې دوام لري
د میدان وردګ ولایت سیداباد ولسوالۍ اړوند د غازي بابا لومړني ښوونځي ته د ۹۰۰ سعودي ريالونو په ارزښت د دې ولسوالۍ د يو شمېر اوسېدونکو له خوا چې په متحده عربي اماراتو کې ژوند کوي، مرسته وشوه. د همدې ولسوالۍ د بي بي مهرو په کلي کې د ۳۰۰ امریکايي ډالرو په ارزښت د یوې دیني مدرسې سره مرسته شوه. دغه راز د همدغې ولسوالۍ د نورالمشایخ له ښوونځي سره ۱۰ زره ۷۰۰ افغانۍ نغدي مرسته وشوه. همدارنګه د یو علمي شخصیت له خوا د دغې ولسوالۍ د تنګي عثمانیه لېسې سره ۱۵ زره افغانۍ مرسته وشوه. د پوهنې مسئولينو دڅرګندونو له مخې: په پام کې ده چې له يادو مرستو څخه د دغو ښوونځيو د ستونزو د حل او د اړتيا وړ وسايلو په برابرولو کې استفاده وشي. د پوهنې وزارت رهبري د میدان وردګ ولایت د علم پروره او په ځانګړې توګه د دغه ولایت د سیداباد ولسوالۍ له اوسېدونکو د همکارۍ له امله مننه کوي.
