د بامیان ولايت پوهنې رهبرۍ له لوري، د ساینس ستوري سیالیو ممتاز زده کوونکی وستايل شو
په دې وروستیو کې د ساینسي موضوعاتو په اړه هغه علمي سیالۍ چې د پوهنې وزارت له خوا د هېواد په کچه په ټولو ولایتونو کې د ښوونځیو د زده کوونکو ترمنځ په لاره اچول شوې وې، په ترڅ کې یې د بامیان ولایت د یو ښوونځي زده کوونکي عزیزالله په یادو سیالیو کې دویم مقام خپل او د همدغه ولایت د مشرتابه پلاوي له خوا وستایل شو. په یادو مراسمو کې د بامیان والي الحاج مولوي عبدالله سرحدي، پوهنې رئیس، مسئولینو، علماءکرامو، د سیمه ییزو ادارو چارواکو او قومي مخورو حضور درلود. په پیل کې د یاد ولایت والي دغه زده کوونکي ته چې د هېواد په کچه یې د ساینس ستوري په سیالیو کې دویم مقام خپل کړی و، د بریا مبارکي وویله او په خپلو خبرو کې یې د بااستعداده ځوانانو د ستاینې د ارزښت په اړه تفصیلي خبرې وکړې. ورپسې د ياد ولايت پوهنې رئيس هم د موضوع په اړه وینا وکړه. نوموړي ډاډ ورکړ، چې د پوهنې وزارت به د ځوانانو د علمي کچې لوړولو لپاره خپلې هڅې لاپسې ګړندۍ کړي. د ویناوو په پای کې عزیزالله چې د هېواد په کچه یې په ساینسي مضامینو کې دویم مقام ګټلی و، د مسئولینو له لوري په جایزو او ډالیو وویاړل شو.
