د پوهنې وزارت مالي او حسابداري رئیس پکتیکا ته رسمي سفر وکړ
د پوهنې وزارت مالي او حسابداري رئیس مولوي صدرالدین سعد، د پکتیکا ولایت د پوهنې ریاست مالي، اداري، ساختماني پروژو د بیا کتنې، د ښځینه ښوونکو د کاري ساعتونو د تنظیم (تدریسي مسئولیت)، د ښوونکو د پور ورکولو صندوق رامنځته کولو، د مدارسو د طلابو د خوراکي توکو لپاره د اعاشې چمتو کولو، د لګښتونو او تدارکاتو هر اړخيزې څارنې په موخه، یاد ولایت ته ورسېد.
نوموړي د ياد ولایت له پوهنې رئيس مولوي عبدالوکيل خالد او د یو شمېر کلیدو څانګو آمرینو سره په کتنه کې د خپل سفر پر موخو او د علاقې وړ موضوعاتو په اړه مفصلې خبرې وکړې.
په پیل کې د پکتیکا پوهنې رئیس د پوهنې وزارت مالي او حسابداري رئیس ته د ښه راغلاست ترڅنګ، د پلاوی د موخو د تطبیق په برخه کې د لازمو آسانتیاوو برابرولو په برخه کې د همکارۍ ډاډ ورکړ.
په پام کې ده چې د پوهنې وزارت مالي او حسابداري رئیس د يادو چارو تر ارزونې او دغه ولايت ته د پلاوي د سفر د پلان له تطبيق وروسته خوست ولايت ته په رسمي سفر ولاړ شي.
