د پوهنې وزارت مالي او حسابداري رئیس پکتیا ته په رسمي سفر ولاړ
د پوهنې وزارت د مالي او حسابداري رئیس مولوي صدرالدین «سعد» په مشرۍ پلاوی د رسمي سفر په ترڅ کې پکتیا ولایت ته ورسېد.
په پیل کې د پوهنې وزارت د مالي او حسابداري رئیس د پکتیا ولایت له پوهنې رئیس الحاج مولوي عبدالقیوم فاروقي او آمرینو سره په کتنه کې، د روان ۱۴۰۳ لمریز کال د بودیجې د حفظ او مناسب لګښت په اړه د خبرو ترڅنګ، د یو شمېر نورو مهمو موضوعاتو لکه، په مالي، لګښتونو او تدارکاتو مفصلې خبرې وکړې.
ورپسې د یاد ولایت پوهنې رئیس ورغلي پلاوي ته ښه راغلاست ووایه او د دغه ریاست د بودیجې د څرنګوالي او لګښتونو په اړه یې د دغه ریاست د کړنو په اړه هر اړخیز معلومات وړاندې کړل، چې د مشرتابه پلاوي له لوري ومنل شول او ستاینه یې وشوه.
ټاکل شوې چې پلاوی به په دغه سفر کې د یاد ولایت د پوهنې ریاست د بودیجې ستونزې په هر اړخیزه توګه وڅېړي.
د پکتیا ولایت پوهنې رئیس د دغه پلاوي د سفر د موخو د عملي کولو او هغوی ته د لازمو آسانتیاوو برابرولو په برخه کې د هر اړخیزو همکاریو ژمنه وکړه.
