د کابل ښار د ښوونځیو د ساینس ستوري او ساینسي پروژو ممتاز زده کوونکي وستایل شول
د ساینس ستوري او ساینسي پروژو هغه علمي سیالۍ چې څه موده مخکې د کابل ښار پوهنې ریاست لخوا، د رسمي او خصوصي ښوونځیو د زده کوونکو ترمنځ په لاره اچول شوې وې، نن یې ممتاز زده کوونکي د پوهنې مسئولینو له لوري، د یو لړ پرتمینو مراسمو په ترڅ کې وستایل شول.
په یادو مراسمو کې د پوهنې وزارت د کیفیت تضمین معین الحاج مولوي عبدالخالق صادق، د کابل ښار پوهنې رئیس قاري عبدالباسط حقاني، د ښوونیزو ناحیو آمرینو، د رسمي او خصوصي ښوونځیو مسئولینو او زده کوونکو ګډون درلود.
غونډه د قرآن کریم د څو مبارکو آیتونو په تلاوت سره پیل شوه؛ ورپسې د کابل ښار پوهنې رئیس په خپله پرانیستونکې وینا کې مېلمنو ته د ښه راغلاست ترڅنګ، د یادې علمي غونډې په تړاو ګډون والو ته مفصل معلومات وړاندې کړل.
دغه راز د پوهنې وزارت د کیفیت تضمین معین د ساینس ستوري ګټونکو زده کوونکو ته د مبارکۍ په ترڅ کې زیاته کړه، چې د افغانستان.ا.ا. د پوهنې وزارت په خپل ټول توان سره د پوهنې کیفیت او لازیات پرمختګ ته ژمن دی.
نوموړي د پوهنیز ډګر وروستیو پرمختګونو ته په اشارې سره وویل چې یاد وزارت د دیني او ساینسي دواړو علومو په برخه کې کیفیت، متوازن پرمختګ او پراختیا ته جدي پاملرنه کوي.
د مسئولینو په وینا دغه علمي سیالۍ د کابل ښار اړوندو ښوونځیو ترمنځ ترسره شوې چې تر ارزونې وروسته د ساینس ستوري په برخه کې ۴ تنه ممتاز زده کونکي و پېژندل شول او همدارنګه د ساینسي پروژ په برخه کې له هرې ښوونیزې ناحیې څخه د ۳ بابه ښوونځيو زده کوونکو عالي مقامونه خپل کړل.
یاد مراسم ممتازو زده کوونکو ته د جایزو او ډالیو په وېشلو او دعائیې په لوستلو سره پای ته ورسېدل.
