د پوهنې وزارت د ښوونکو د روزنې او مسلکي پراختیا ریاست علمي غړو لپاره میتودیکي ورکشاپ جوړ شو
د پوهنې وزارت د ښوونکو د روزنې او مسلکي پراختیا د رئیس مولوي محمد ابراهیم عمري لخوا، د ښوونکو د روزنې او مسلکي پراختیا ریاست ۸۳ تنو علمي غړو ته د چمتوالي میتودیکي ورکشاپ پرانیستل شو.
د یاد ورکشاپ د پرانیستلو په مراسمو کې د پوهنې وزارت د ښوونکو د روزنې رئیس، د تدریسي کیفیت لاښه والي په موخه د کارکوونکو په ځانګړې توګه د ښوونکو د کاري وړتیاوو درلودلو اهمیت ته اشاره وکړه او د ورکشاپ ګډون والو ته یې د خپلو مسئولیتونو په اړه معلومات ورکړل.
نوموړي له هغوی څخه وغوښتل چې د یاد ورکشاپ له منځپانګې څخه غوره ګټه پورته کړي.
د یادونې وړده، چې دغه پروګرام د هېواد د ۲۲ ولایتونو د مرکز او ولسوالیو د ښوونیزو مرکزونو د ۲۵۰۰۰ آمرینو، مدیرانو، سرښوونکو، ښوونکو او د ښوونځیو د شوراګانو لپاره په لاره اچول شوی، چې ګډون والو ته به د لومړنیو ټولګیو د زده کوونکو اړوند علمي او میتودیکي تدریس طریقې ور وښودل شي.
د غونډې ګډون والو د مسلکي وړتیاوو د لوړولو په موخه د میتودیکي او علمي ورکشاپونو د پیل هرکلی وکړ او په یاده برخه کې یې د پوهنې وزارت د رهبرۍ له پاملرنې مننه وکړه.
