د پوهنې وزارت د شهادتنامو رئیس بدخشان ولایت ته په رسمي سفر ولاړ
د پوهنې وزارت د شهادتنامو رئیس مولوي عبدالقدیم محمد آخندزاده بدخشان ولایت ته د خپل رسمي سفر په ترڅ کې، د پوهنې ریاست له مسئولینو په ځانګړې توګه د نتایجو او شهادتنامو څانګې له آمرینو او مدیرانو سره وکتل.
په دې کتنه کې د پوهنې وزارت د شهادتنامو رئیس د تعلیمي چوپړونو په وړاندې کولو کې د کیفیت په لاښه والي او د نتایحو د تایید په بهیر کې د روڼتیا پر اهمیت ټینګار وکړ او یادونه یې وکړه، چې د دغو خدمتونو په وړاندې کولو کې سرعت او دقت ځانګړی اهمیت لري.
له همدې امله د یادې غونډې په ترڅ کې پرېکړه وشوه، چې د بدخشان ولایت د پوهنې ریاست به د کوف آب، شکي، نسي، مایمي، شغنان، واخان، خواهان، یمګان، یاوان، کوهستان، راغستان، کران او منجان ولسوالیو اړوند د عمومي زده کړو او اسلامي زده کړو د نتایجو جدولونه د نهایي تایید په موخه مر کز ته واستوي.
په پاى کې د بدخشان ولايت د پوهنې رياست مسئولينو ژمنه وکړه، چې د نتایجو او شهادتنامو د صادرولو په برخه کې به ټول اقدامات په دقت او په ټاکلي وخت ترسره او مرکز ته به يې واستوي.
