د پوهنې وزارت د سواد زده کړې رياست نوی رئیس معرفي شو
د پوهنې وزارت د ښوونې او روزنې د معین الحاج مولوي سخاءالله سعید له لوري، مولوي عبیدالله آخندزاده د سواد زده کړې رياست د نوي رئیس په توګه د یاد ریاست کارکوونکو او منسوبینو ته ور وپېژندل شو او رسماً یې خپله دنده پیل کړه.
په پیل کې د پوهنې وزارت د ښوونې او روزنې معین په ادارو کې د مسئولينو او کارکوونکو د تبدیل او ګمارنې اداري اصولو ته په اشارې سره څرګنده کړه: په ادارو کې اداري بدلونونه یو اصل دی او دغه بدلونونه د چارو د لاښه والي او پرمختګ په موخه رامنځته کېږي.
ورپسې د سواد زده کړې رياست نوي رئیس مولوي عبيدالله آخند زاده د پوهنې وزارت د سواد زده کړې په څانګه کې د ګمارنې له امله د پوهنې وزارت له رهبرۍ څخه د مننې ترڅنګ ژمنه وکړه، چې په هېواد کې به د بې سوادۍ له منځه وړلو په برخه کې نه ستړې کيدونکې هلې ځلې کوي.
