په بغلان ولایت کې د یو باب مدرسې بیارغونې چارې پیل شوې
د پوهنې وزارت سرپرست الحاج مولوي حبیب الله آغا چې د هېواد یو شمېر شمالي ولایتونو ته په رسمي سفر تللی، له بلخ ولایت څخه تر راستنېدو وروسته په بغلان ولایت کې دمحمدیه مدرسې د ودانۍ بیارغولو چارې پرانیستلې.
په دغو مراسمو کې د یاد ولایت پوهنې رئیس الحاج مولوي محمد نور عزیزي، د یو شمېر ادارو رئیسانو، علماوو او نورو سیمه ییزو مسئولینو هم حضور درلود.
د پوهنې وزارت سرپرست د يادې مدرسې د بيارغونې چارو پرانیستې پر مهال، په تعليمي ادارو کې د تدريس پر کيفيت ټينګار وکړ او له استادانو يې وغوښتل چې د هېواد بچیانو د زده کړې په برخه کې له دقت او پوره اخلاص څخه کار واخلي.
نوموړي د دغه سفر په دوام د یاد ولایت د شهید مولوي لعل محمد محمدي مدرسې او د مولوي محمد یونس مخلص له دارالاېتام څخه هم لیدنه وکړه او د همدغو ښوونیزو بنسټونو له مسئولینو او زده کوونکو سره یې له نیږدې وکتل.
