د بلخ ولایت مرکز او یو شمېر ولسوالیو ته د پوهنې وزارت د سرپرست درې ورځنی سفر پای ته ورسېد
د پوهنې وزارت سرپرست الحاج مولوي حبیب الله آغا، بلخ ولایت ته د خپل درې ورځني رسمي سفر په ترڅ کې، د یاد ولایت په مرکز سربېره د مارمل، دهدادي، نهرشاهي، بلخ او دولت آباد ولسوالیو ته ولاړ او هلته یې د پوهنې آمرینو، مسئولینو، علماوو او منسوبینو ته د پوهنیز کیفیت لوړوالي، پرمختګونو او ښوونیز وضعیت د لا ښه والي په تړاو اړینې سپارښتنې وکړې.
دغه راز نوموړي د پوهنې ریاست د سیمه ایزو مسئولینو او منسوبینو یو لړ وړاندیزونه، نظریات او شته ستونزې واورېدې او ژمنه یې وکړه، چې د یادو ستونزو او ننګونو د حل په برخه کې به لازمه همکاري کوي.
په پای کې د یاد ولایت پوهنې رياست مسئولینو د پوهنې وزارت د سرپرست ته د یاد وزارت د ټولو کړنلارو او سپارښتنو د پلي کېدو ډاډ ورکړ.
د یادونې وړ ده، چې د پوهنې وزارت سرپرست بلخ ولایت ته د خپل رسمي سفر په درشل کې، د ۹ بابه ښوونیزو بنسټونو ودانۍ د ۱۵۳ مېلیونه افغانیو په ارزښت پرانیستلې او ګټې اخیستنې ته یې وسپارلې.
