د پوهنې وزارت سرپرست له لوري په بلخ ولایت کې یو شمېر مدارس او ښوونځي پرانیستل شول
د پوهنې سرپرست الحاج مولوي حبیب الله آغا بلخ ولایت ته د خپل رسمي سفر په ترڅ کې، چې د یاد ولایت پوهنیز وضعیت ارزونې په موخه یې درلود؛ د دغه ولایت د پوهنې مسؤلینو حضور کې په رسمي ډول لاندې مدارس او ښوونځي پرانیستل:
۱- په مرکز مزارشریف ښار کې «د المهتدون مدرسه»، چې ۳۵ مېلیونه افغانۍ لګښت پرې راغلی.
۲- د بلخ ولایت په نهر شاهي ولسوالۍ کې «د حنیفه البیضاء مدرسه»، چې ۱۱ مېلیونه افغانۍ لګښت پرې راغلی دی.
۳- په مزارشریف ښار کې د حسن بن علي« کرم الله وجهه» دیني مدرسه، چې د ۴ مېلیونه افغانیو لګښت سره جوړه شوې ده.
۴- د مرکز اړوند هوايي بلاکونو عالي لېسه، چې د ۳۸ مېلیونه ۳۸۷ زره ۸۰۰ افغانیو په ارزښت یې د جوړېدو چارې بشپړې شوې دي.
۵- په مزارشریف کې «د مهجوبه هروي لومړني ښوونځي ودانۍ » چې په جوړولو یې ۲۵ مېلیونه ۶۶۰ زره ۲۵۰ افغانۍ لګښت راغلی.
۶- د یاد ولایت په مارمل ولسوالۍ کې «د ملا افغان منځنی ښوونځی»، چې د ۸ مېلیونه ۲۵۲ زره ۶۴۷ افغانیو لګښت سره جوړ شوی دی.
د يادونې وړ ده، د بلخ عالي دارالعلوم هم د پورتنيو ښوونیز بنسټونو د ودانيزو پروژو له جملې څخه دى، چې په دې وروستيو کې يې د جوړېدو چارې پيل شوې او لګښت يې ۵ مېليونه افغانۍ اټکل شوى دى.
د ویلو ده، چې ياد ښوونيز بنسټونه د پوهنې په برخه کې د همکارو ادارو په مالي مرسته رغول شوي دي.
د پوهنې وزارت سرپرست د یادو پروژو د پرانیستنې پر مهال په خپلو خبرو کې، د پوهنې ریاست مسئولینو او کارکوونکو ته لارښوونه وکړه، چې د هېواد بچیانو سره له هر ډول اړیکو پرته ښه چلند وکړي او هغوی ته په اسلامي روحیه او هېواد ته د صادقانه خدمت په موخه روزنه ورکړي.
