په بغلان ولايت کې د یو باب لېسې د ودانۍ بیارغونه پیل شوه
د بغلان ولایت مرکز اړوند «د غلام جیلاني جلالي لېسې» د بیارغاونې چارې د یو لړ مراسمو په ترڅ کې پیل شوې.
د بغلان ولایت پوهنې رئیس الحاج مولوي محمد نور عزیزي، د یادې لېسې د ودانۍ بیارغونې د پیل په مراسمو کې وویل: دغه لېسه له ډېرې مودې راهیسې د تېرې ادارې د اربکیانو له خوا غصب شوې وه او زده کوونکي یې له حقه بې برخې وو؛ چې لله الحمد، د افغانستان.ا.ا. په حاکمیت سره دغه عالي لېسه، بیا ځلې د هېواد بچیانو ته د زده کړو په موخه چمتو شوه.
نوموړي وويل، چې اوسمهال د بغلان ولايت پوهنې رياست په هلو ځلو او دغلام جيلاني جلالي بنسټ په مالي مرسته، دهمدغې لېسې بيارغونې چارې پيل شوې دي.
د یاد ولایت پوهنې رئیس داسلام دستر پيغمبر حضرت محمد «صلى الله عليه وسلم» د مبارک حديث په استناد، دښوونيزو بنسټونو جوړول يو له صدقه جاریه نېکو اعمالو څخه وبلل؛ له ملي سوداګرو او شتمنو اشخاصو څخه يې وغوښتل، چې له پوهنیز نظام سره خپلو مالي او معنوي همکاریو ته دوام ورکړي.
