د ولایتونو پوهنې کړنو ته لنډه کتنه
بلخ
يو خيريه بنسټ، د بلخ ولايت د ښوونځيو له یوزره ۴۷۵ تنو زده کوونکو سره د ۳ میلیونه ۶۸۷ زره ۵۰۰ افغانيو په ارزښت، د بکسونو او درسي توکو مرسته وکړه، چې د یاد ولايت د پوهنې رياست د مشرتابه په حضور کې ووېشل شول.
کندوز
د کندوز ولایت د مقام رسمي پلاوي، چې د یاد ولایت د کار او ټولنیزو چارو، بشري سرچینو، اداري اصلاحاتو او اقتصاد ریاستونو استازو پکې ګډون درلود، د پوهنې ریاست له دندو او اداري کړنو څخه څارنه وکړه.
پروان
د پروان ولایت پوهنې رئیس مولوي سید محمد فیضي د میرعلي احمد شهید او حضرت نعمان (رحمه الله علیه) لېسو څخه لیدنه او څارنه وکړه.
بدخشان
د پوهنې سره د یو همکار بنسټ له لوري، د بدخشان ولایت د شغنان ولسوالۍ د ۷ بابه ښوونځیو ۲۹ تنو ښوونکو او سرښوونکو ته د "انسان محوره طرحې" تر سرلیک لاندې ښوونیز ورکشاپ جوړ شو.
کاپیسا
د کاپيسا ولايت پوهنې رياست وايي: د پوهنې وزارت د نتایجو او شهادتنامو ریاست د ارزونې او طبقه بندۍ پر بنسټ، د یاد ولايت پوهنې رياست د ۱۴۰۲ کال فارغانو د نتايجو په ترتيب او لېږلو کې د هېواد په کچه لومړى مقام خپل کړى دى.
