په لغمان ولایت کې د یوې دیني مدرسې جوړولو لپاره ځمکه وقف شوه
د هېواد له پوهنیز نظام سره د ولسونو د همکارۍ په دوام، نن د لغمان ولایت د قرغه یي ولسوالۍ علم پروره خلکو د یو میلیون افغانیو په ارزښت خپله ۲۰ جرېبه ځمکه په یاد ولایت کې «دارالارقم» مدرسې جوړولو په موخه پوهنې ریاست ته تسلیم کړه.
په یادو مراسمو کې د پوهنې مسئولينو، ديني علماوو او قومي مخورو ګډون درلود.
د پوهنې وزارت مشرتابه د پوهنې په برخه کې د لغمان ولایت د قرغه یي ولسوالۍ د خلکو له ملاتړ او مرستو مننه کوي.
د لغمان پوهنې رئیس مولوي شاه جهان ساجد د ځمکې د ورکړې او د علمي بنسټونو د جوړولو د ارزښت په اړه خبرې وکړې.
دغه راز نوموړي له پانګه والو او ملي سوداګرو وغوښتل، چې د یادې مدرسې د ودانۍ په جوړولو کې د لغمان ولایت پوهنې ریاست سره همکاري وکړي.
د يادونې وړ ده، چې اوسمهال په دغه مدرسه کې ۲۳۰ تنه زده کوونکي زده کړې کوي.
