په غزني ولایت کې د یو شمېر خصوصي ښوونځیو د کار او کړنو څخه ارزونه وشوه
د خصوصي ښوونځيو له کړنو څخه د ارزونې ځانګړې کمېتې له لوری، په دې ورستیو کې د غزني ولایت د یو شمېر خصوصي ښوونځيو له کړنو څخه څارنه ترسره شوه، چې په پایله کې یې یو شمېر خصوصي ښوونیز بنسټونه د پوهنې وزارت له قوانینو، مقرراتو او لایحو څخه د یو شمېر سرغړونو لکه: له ټاکل شویو نورمونو څخه د زیاتو فیسونو اخیستلو او د معیاري ښوونیزو او روزنیزو چوپړونو د نشتوالي له امله د هغوی فعالیتونه د یو څه مودې لپاره وځنډول شول.
د غزني ولايت پوهنې رئيس الحاج مولوي مير نصير احمد حسيني په ياد ولايت کې د يو شمېر خصوصي ښوونځيو او ښوونيزو بنسټونو د مسئولينو له لوري سرغړونو ته په اشارې سره وویل، چې د یاد ولایت د خلکو د شکایتونو له مخې، د پوهنې ریاست د څارنې ټېم له یادو ښوونځیو څخه څارنه کړې، چې د یو لړ ستونزو د موجودیت په تړاو یې د خصوصي ښوونیزو بنسټونو مسئولینو ته رسمي توصیې کړې او د هغوی فعالیتونه د یو څه مودې لپاره ځنډول شوې دي.
له بلې خوا د غزني ولايت اوسېدونکو د پوهنې رياست د دغه اقدام ستاينه وکړه او د یاد رياست له پروګرامونو او پلانونو يې خپل ملاتړ اعلان کړ.
