په میدان وردګ ولایت کې د سیرت النبي « صلی الله علیه وسلم» سیالۍ ترسره شوې
د میدان وردګ ولایت پوهنې ریاست، په شیخ زاهد پوهنتون کې د میدان وردګ ولایت محصلینو د خپلواکې ټولنې په همکارۍ، د یاد ولایت چک ولسوالۍ د مدارسو او ښوونځیو د ۷۰۰ تنو زده کوونکو ترمنځ د سیرت النبي «صلی الله علیه وسلم» سیالي په لاره واچوله.
همدارنګه د یادو محصلینو د استازو او د پوهنې مسئولینو له لوري د یادو سیالیو د روڼتیا په موخه څارنه ترسره شوه.
د میدان وردګ ولایت د پوهنې ریاست مسئولین وايي، چې د سیالیو له ترسره کېدو یې اساسي موخه، د اسلام د ستر پیغمبر حضرت محمد «صلی الله علیه وسلم»د ژوند او اخلاقو په تړاو د زده کوونکو د پوهاوي د کچې لوړول او د اسلامي فرهنګ پراختیا ده.
د يادونې وړ ده، چې په دې وروستيو کې د پوهنې رياستونو د يو شمېر ملاتړو بنسټونو په همکارۍ، د هېوا په زیات شمېر ولایتونو کې دا ډول سيالۍ په لاره اچولې دي.
