د پوهنې وزارت د دعوت او ارشاد ریاست مسئولینو او د کابل ښار د علماوو شورا مرستیال له اماني لېسې څخه لیدنه وکړه
د پوهنې وزارت د دعوت او ارشاد ریاست په همغږۍ، د کابل ښار د علماوو شورا مرستیال شیخ ظاهر خان خادم په داسې حال کې چې د یاد وزارت د دعوت او ارشاد ریاست د مسئولینو له لوري یې ملیتا کېدله، نن د اماني عالي لېسې له مسئولینو، ښوونکو، زده کوونکو او پرسونل سره وکتل.
د غونډې پرمهال، یاد پلاوي د ټولنې په اصلاح کې د دیني لارښوونو پر رول هراړخیزې خبرې وکړې او زده کوونکو ته یې لارښوونه وکړه، چې په خپلو ورځنیو چارو کې د اسلام د ستر پیغمبر حضرت محمد «صلی الله علیه وسلم» سنت او کړنلاره عملي کړي.
له بلې خوا د یادې لېسې مسئولینو هم ژمنه وکړه، چې د پوهنې وزارت د مشرتابه د لارښوونې له مخې به ځوانانو ته په اسلامي او ملي روحیه روزنه ورکوي او په خپل ورځني ژوند او چارو کې به د اسلام د ګران پیغمبر حضرت محمد «صلی الله علیه وسلم» لارښوونې عملي کړي.
غونډه د دعائیې په لوستلو سره پای ته ورسېده.
