د کابل ولایت په سروبي ولسوالۍ کې یو باب لومړنی ښوونځی تاسیس شو
د کابل ولایت سروبي ولسوالۍ اړوند په دهن قم کلي کې د ابوبکرصدیق «رضی الله عنه» لومړنی ښوونځی، د پوهنې مسئولینو، علماوو او د سیمې د قومي مخورو په ګډون د یو لړ مراسمو په ترڅ کې ګټې اخیستنې ته چمتو شو.
د کابل ولايت پوهنې مسئولين وايي: د سروبي ولسوالۍ د څو کليو اړوند د پوهنې دوستو خلکو خپله شخصي (یو جرېب ځمکه )، د یاد ښوونځي د جوړولو لپاره پوهنې رياست ته وقف کړه.
د سروبي ولسوالۍ پوهنې آمر د سیمې د با احساسه خلکو له وطن دوستۍ څخه د مننې ترڅنګ، ژمنه وکړه، چې ډېر ژر به د یاد ښوونځي لپاره ودانۍ په اساسي ډول ورغول شي.
د يادونې وړ ده، چې د دغه ښوونځي په جوړېدو سره د يادې ولسوالۍ د څلورو کليو شاوخوا ١٥٠ تنو ماشومانو ته د زده کړو آسانتیا برابره شوه.
د سيمې اوسېدونکو هم په علمي ډګر کې د پوهنې رياست له هلو ځلو مننه وکړه.
