د دایکنډي ولایت په مرکز کې د دوو دیني مدارسو څانګې پرانیستل شوې
د دايکنډي ولايت په مرکز نيلي ښار کې د ښځینه وو ديني مدرسې (بي بي زهرا رضی الله عنها) لومړۍ څانګه پرانیستل شوه.
د یادې مدرسې د پرانیستې په مراسمو کې د پوهنې په رئیس سربېره علماوو او قومي مخورو هم ګډون کړی وو.
د دايکنډي ولايت پوهنې رئيس قاري عنايت الله سهار، د ښوونيزو مرکزونو جوړول د هېواد د ماشومانو د سالمې ښوونې او روزنې په لاره کې يو مهم ګام وباله او د ټولنې په اصلاح کې يې د ښوونځيو او مدارسو پر اهميت خبرې وکړې.
د یاد ولايت د پوهنې رياست د مسئولينو په وينا، دغه مدرسه په يو وخت کې د ٢٠٠ زده کوونکو ظرفيت لري، چې د سيمې علماوو او اوسېدونکو یې په جوړېدو خوښي څرګنده او د پوهنې وزارت له مشرتابه يې د دوی د اولادونو د سالمې روزنې په برخه کې مننه او قدرداني وکړه.
د یو بل خبر له مخې:
د يادې مدرسې دويمه څانګه د همدې ولايت مرکز اړوند د سنګموم په سيمه کې د پوهنې مسئولينو او د يادې سیمې د قومي مخورو په حضور کې پرانيستل شوه.
د سيمې يو تن قومي مخور محمد نادر د ښوونيزو بنسټونو په جوړولو کې د پوهنې وزارت له هڅو څخه د خوښۍ په څرګندولو سره، د هېواد د ښوونیز نظام په ټينګښت کې د دایکنډي ولايت د خلکو د همکارۍ او ملاتړ ډاډ ورکړ.
