د ولایتونو پوهنې کړنو ته لنډه کتنه
سرپل
د پوهنې وزارت د معلوماتو او احصائیې ریاست پلاوي د سرپل ولایت له پوهنې ریاست سره په همغږۍ، له مسئولینو سره په مرکز او ولسوالیو کې د ښوونکو او زده کونکو د احصائیې ثبتولو، درسي کتابونو او نورو اړوندو موضوعاتو په تړاو شپږ ورځنى سيمينار داير کړ.
دایکنډي
د دایکندي ولایت پوهنې ریاست، د یو شمېر ښوونځیو ښوونکو ته د ظرفیت لوړونې سیمینار جوړ کړ.
د ياد ولايت پوهنې رئيس قاري عنايت الله سهار وويل: د دغه پروګرام له پيلولو يې موخه، د ژمي په دريو مياشتو کې د ښوونکو د پوهې کچې لوړول او د راتلونکي ښوونيز کال په پيل کې د تدريس لپاره بشپړ چمتووالى دى.
کندز
د کندز ولايت امر بالمعروف او نهى عن المنکر رياست مشرتابه پلاوي، د ياد ولايت له پوهنې رئيس الحاج مولوي محمداسماعيل ابواحمد سره وکتل او له نوموړي يې وغوښتل، تر څو د پوهنې کارکوونکو له لوري د اسلامي احکامو پلې کولو ته جدي پاملرنه وکړي.
د کندوز پوهنې رئيس ډاډ ورکړ، چې په دې لاره کې به له هېڅ راز هڅې ډډه ونه کړي.
بغلان
د بغلان ولایت پوهنې رئیس الحاج مولوي محمد نور عزیزي د خنجان ولسوالۍ پوهنې عمومي وضعیت د کتنې پر مهال، د دیني مدارسو د استادانو د آزموینې له بهیر څخه هم څارنه وکړه او ګډون کوونکو ته يې په یاده پروسه کې د روڼتيا او عدالت ډاډ ورکړ.
کندهار
د کندهار ولايت په شاه وليکوټ ولسوالۍ کې خصوصي او سيمه ييزو مدارسو ته د درسي کتابونو د وېش لړۍ پيل شوه.
د کندهار پوهني رياست مسئولين وايي: په يادو کتابونو کي له لومړي څخه تر درېيم ټولګي پوري شامل دي.
