د پوهنې وزارت سرپرست د کاردان ښوونیزې مؤسسې له کامپلکس څخه لیدنه وکړه
د پوهنې وزارت سرپرست الحاج مولوي حبیب الله آغا چې د یاد وزارت یو شمېر مرکزي رئیسانو یې هم ملتیا کوله؛ د کاردان ښوونیزې مؤسسې له کامپلکس څخه لیدنه وکړه.
د پوهنې وزارت سرپرست او مل پلاوی د کاردان ښوونیز بنسټ ته په رسېدو سره د یاد علمي بنسټ د رئیس ډاکټر احمد خالد حاتم او استادانو له تود هرکلي سره مخامخ شو.
په پیل کې د کاردان علمي مؤسسې رئیس د پوهنې وزارت مشرتابه ته، د یاد کامپلکس د جوړښت، کړنو او تدریسي مېتودونو په اړه هر اړخیز معلومات ورکړل.
ورپسې د پوهنې وزارت سرپرست د یاد بنسټ د مشرتابه له مېلمه پالنې څخه د مننې په ترڅ کې وویل: الحمدلله افغانستان په ټولو دیني او علمي برخو کې روزل شوي او علمي کادرونه لري؛ موږ غواړو چې د خپل ګران هېواد د پرمختګ او پر ځان بسیاینې په برخه کې د دوی له علمي لاسته راوړنو او تجربو څخه غوره ګټه پورته کړو.
نوموړي زیاته کړه: موږ د تخنیک او ټکنالوژۍ په عصر کې ژوند کوو؛ د پوهنې وزارت هڅه دا ده، تر څو د هېواد بچیان په معاصره ټکنالوژۍ سمبال کړي.
د پوهنې وزارت سرپرست د قرآن کریم مبارک آیت شریف ته په اشارې سره وویل: اوس د دې وخت دی چې دیني او عصري علوم زده کړو، د خپل هېواد په پرمختګ او سوکالۍ کې خپل اسلامي او ملي مسئولیت اداء کړو، د لوی خدای(جل جلا له) په مرسته، افغانستان د شاته تګ څخه وژغورو؛ خپلو خلکو ته د هوسا ژوند زمینه برابره کړو، او دا زما د اوږد مهاله هیلو څخه دي.
همدارنګه نوموړي څرګنده کړه: موږ به دغه موخې ته هغه وخت ورسېږو چې د توحید تر چتر لاندې په بشپړه ورورولۍ او اسلامي اخوت سره یو بل ته لاس ورکړو، د خپل هېواد د مطلوبو موخو د ترلاسه کولو لپاره شپه او ورځ هڅې وکړو؛ چې هغه په حقیقت کې پرمختګ او سوکالي ده.
ورپسې د پوهنې وزارت سرپرست د یاد ښونیزو بنست له مسئولينو سره يو ځای د کاردان علمي کامپلکس د ښوونځيو له څانګو او ټولګيو څخه ليدنه وکړه، چې په ترڅ کې يې د یاد بنست د رئيس له لوري توضېحات ورکړل شول.
د پوهنې وزارت مشرتابه د هېواد له هغو پوهنې مسئولینو مننه وکړه، کوم چې د ښوونیزو او تحصیلي بنسټونو په جوړولو سره یې د نړۍ په کچه د مسلکي کسانو د ښوونې او روزنې په برخه کې فعاله ونډه اخیستې او دوی ته یې ډاډ ورکړ، چې د پوهنې وزارت به د پوهنې د ټولو مینه والو او فعالانو سره د ښوونې د لاپرمختګ په برخه کې د ښه همکار په توګه پاتې شي.
