د بدخشان ولایت ارګو ولسوالۍ د پوهنې آمریت نوې ودانۍ پرانیستل شوه
د بدخشان ولایت ارګو ولسوالۍ پوهنې آمریت د نوې ودانۍ چارې بشپړې او ګتې اخیستنې ته وسپارل شوه.
په همدې موخه په جوړه شوې غونډه کې د بدخشان ولایت پوهنې رئیس مولوي محراب الدین اقبال، د یاد ولایت بااحساسه خلکو له همکارۍ څخه د مننې او قدردانۍ په ترڅ کې، پوهنه د ټولنې روح، زړه او ملا تیر وبلله او ژمنه یې وکړه، چې د یاد ولایت بچیانو لپاره به د معیاري او لوړ کیفیت زده کړو په برخه کې جدي هڅې کوي.
د ارګو ولسوالۍ پوهنې آمر هم د یادې موضوع په اړه خبرې وکړې او د دغه ودانۍ د جوړېدو په اړه یې داسې معلومات ورکړل: د ارګو ولسوالۍ د پوهنې آمریت نوې ودانۍ په دوه پوړونو کې چې ۷ اداري خونې، د غونډو تالار او نور ضروري ملحقات لري؛ په دوه جرېبه ځمکه کې د دوه میلیونه ۸۰۰ زره افغانیو په لګښت سره د ښوونکو، سوداګرو او د سیمې د خلکو په مالي مرسته جوړه شوې ده.
په پای کې د سیمې یو شمېر علماوو او مشرانو هم خبرې وکړې او د پوهنې له پروګرامونو یې خپل ملاتړ اعلان کړ.
