له ولایتونو څخه د پوهنې د کړنو انعکاس
کونړ
د پوهنې وزارت د ښوونې او روزنې معینیت پلاوي، د کونړ ولايت رسمي او خصوصي ښوونځيو د ښوونيزو کړنو څېړنې په موخه، یاد ولایت ته ورسېد.
پلاوي د یادو ښوونځیو اداري او تدریسي چارې له نیږدې وڅېړلې او د پوهنیز وضعیت لاښه والي په موخه یې مسئولینو ته لازمې سپارښتنې وکړې.
دایکنډي
د دایکنډي ولایت شهرستان ولسوالۍ اړوند د سرنګا سیمې یو شمېر قومي مشرانو د یاد ولایت له پوهنې سرپرست انجنیر صدیق الله ژمن سره وکتل او وړاندیز یې وکړ چې د سنګان ښوونځی دې له ګیزاب ولسوالۍ څخه شهرستان ولسوالۍ ته انتقال شي.
سرپل
د پوهنې ریاست او د سرپل لوړو زده کړو مؤسسې ترمنځ د دوه اړخیزه همکاریو هوکړه لیک لاسلیک شو.
د یاد هوکړه لیک پر بنسټ، دغه پوهنتون ژمن دی، چې د لوړو زده کړو لېوال کسان کوم چې د سرپل پوهنې ریاست له خوا ورپېژندل کېږي، په بېلابېلو څانګو په ځانګړي ډول د ښوونې او روزنې په پوهنځي کې په ځانګړي تخفیف سره ومني.
میدان وردګ
د میدان وردګ ولایت پوهنې ریاست د نوي تشکیلاتي جوړښت د تطبیق چارې پای ته ورسېدې.
د یاد ولايت پوهنې رياست مشرتابه پلاوي له خپلو کارکوونکو سره د يوې غونډې په ترڅ کې، د دغه ریاست نوى تشکیلاتي جوړښت تشرېح او پکې يې بدلونونه اعلان کړل.
سمنګان
د سمنګان ولایت پوهنې رئیس الحاج مولوي نصرت الله فیضاني په یو رسمي سفر د یاد ولایت دره صوف ولسوالۍ ته ولاړ.
نوموړي د کلنیو آزموینو، اداري کړنو، تدریسي چارو، د زده کوونکو د ښوونیزې کچې، د ښوونځیو او مدارسو له کمېټو څخه څارنه وکړه.
