د پوهنې وزارت د سرچینو او اداري معینیت له لوري، د یاد وزارت « د مرکزي ګدامونو او د اجناسو الکترونیکي ثبت سیستم» پرانیستل شو
د پوهنې وزارت «د مرکزي ګدامونو د تنظیم او د اجناسو د ثبت الکترونیکي ثبت سیستم»، د یو لړ مراسمو په ترڅ کې، چې پکې د پوهنې وزارت سرپرست، د یاد وزارت معینانو، یو شمېر مرکزي رئیسانو او کارپوهانو ګډون درلود، نن د رسنیو په حضور کې پرانیستل شو.
یاده غونډه د قرآن کریم د څو مبارکو آیتونو په تلاوت سره پيل شو؛ ورپسې د پوهنې وزارت سرپرست الحاج مولوي حبیب الله آغا په خپلو خبرو کې مېلمنو ته د ښه راغلاست تر څنګ، د یاد وزارت د ګدامونو د تنظیم او د اجناسو د ثبت سیستم پر جوړېدلو خوښي څر ګنده کړه او یاد سیستم یې د اداري چارو لپاره د روڼتیا، عدالت، آسانتیاوو رامنځته کولو، اعتماد او له فساد څخه د مخنیوي پر رامنځته کولو کې خورا اغېزمن وباله او په دې برخه کې یې د سرچینو او اداري معین له هڅو څخه ځانګړې مننه او قدرداني وکړه.
همدارنګه نوموړي له ټولو کارکوونکو څخه د اسلامي نظام پر استحکام ، د هېواد او ولس لپاره د واقعي خدمت کولو پر دوام ټینګار وکړ او زیاته یې کړه، چې په دې برخه کې د پوهنیز نظام کارکوونکي بنسټیز مسئولیت لري تر څو د هېواد بچیان په اسلامي او ملي روحیه وروزي.
په ورته مهال، د یاد وزارت د سرچینو او اداري معین مولوي صبغت الله «وصیل»، د ګدامونو په ترتیب، تنظیم او روڼتیا کې د دغه سیستم پر ګټو خبرې وکړې او له خپلو تخنیکي کارکوونکو څخه یې د مننې ترڅنګ، څرګنده کړه، چې د یاد معینیت تخنیکي ټېم په دې توانېدلی، تر څو په مرکزي ګدامونو کې ټول له کاره لوېدلي اجناس دوباره ترمیم کړي.
نوموړي څرګنده کړه، د خپل اړوند تخنیکي ټېم په مرسته یې شاوخوا ۲۰۰ پایې کمپیوټرونه او۲۲۰ پایې پرنټرونه دوباره د ځانګړي تخنیکي ټېم په مرسته ترمیم کړي دي.
دغه راز د پوهنې وزارت د کیفیت تضمین معین الحاج مولوي عبدالخالق «صادق»، « د مرکزي ګدامونو او د اجناسو الکترونیکي ثبت سیستم» پر ګټو لنډې خبرې وکړې او ویې ویل: دغه سیستم کولای شي، په اړونده اداري برخه کې روڼتیا، پرمختګ، په کارونو کې چټکتیا او عدالت رامنځ ته کړي.
نوموړي د یاد وزارت له ټولو مرکزي رئیسانو څخه د هغوی د اغېزناکو کارونو او نوښتونو له امله ځانګړې مننه وکړه.
همدارنګه نوموړي د پوهنې وزارت اړوند ټولې ادارې، د ملت بچیانو لپاره د دیني او عصري علومو د آسانتیاوو په برابرولو کې مسئولې وبللې.
په پای کې یاد سیستم د پوهنې وزارت د سرپرست په مبارکو لاسونو سره د رسنیو په حضور کې پرانیستل شو.
غونډه په هېواد کې د پوهنیز نظام د لاپرمختګ او اسلامي امت ته د خیر او فلاح په دعائیې سره پای ته ورسېده.
