د پوهنې وزارت د اسلامي زده کړو معين د شمال زون پنځو ولایتونو له پوهنې رئیسانو سره غونډه وکړه
د پوهنې وزارت د اسلامي زده کړو معین الحاج مولوي کرامت الله آخندزاده د شمال زون پنځو لايتونو په مدارسو کې د لیلیو جوړولو د لارښوونو په موخه، د بلخ، جوزجان،سرپل او سمنګان پوهنې ریاستونو د اسلامي زده کړو له آمرينو سره تفصيلي بحث او خبرې وکړې.
په ياده ناسته کې د پوهنې وزارت د اسلامي زده کړو معين د هغه طرحې په اړه خبرې وکړې کوم چې د ا.ا.ا عالي مشرتابه له لوري منظور شوې ده.
په دغه طرحه کې راغلي،د ټولو هغو مدارسو زده کوونکو ته دې د اعاشې او ليليې لګښتونه ورکړل شي کوم چې لږ تر لږه 3 ګاونډ ولسوالۍ تر خپل پوښښ لاندې راولي.
دغه راز د پوهنې وزارت د اسلامي زده کړو معين د مدارسو له مسئولينو سره په خبرو کې د ياد وزارت پر کړنلارې، د مدارسو لپاره د سل زره بستونو د تطبيق پر بهير،د لیلیو پر جوړولو، د زده كوونكو د تعلیمي کچې لوړولو، په مدارسو کې د طالبانو سره د مالي مرستو، د لومړنيو ښوونځيو سره د مدارسو د ښوونيز نصاب همغږي کول او يو لړ نورو مهمو موضوعاتو په اړه څرګندونې وکړې.
په ياده ناسته کې د پوهنې مسئولینو هر یو د خپلو مدارسو لپاره د لیلیو جوړولو د پلان، د شته اداري ستونزو او ننګونو په اړه خبرې وکړې او خپل نظریات یې د پوهنې وزارت له معین سره شريك کړل.
په پاى کې د اسلامي زده کړو معين د شمالي ولايتونو د پوهنې مسئولينو وړانديزونه واورېدل او هغوى ته يې د ستونزو په حل کې د همکارۍ ډاډ ورکړ.
