د يو شمېر ولايتونو د ديني مدارسو زده کوونکو تر منځ د «علمي سياليو» پايلې اعلان شوې
د اړوندو ولایتونو د پوهنې رئیسانو، مسئولینو، دیني علماوو او استادانو په ګډون د جلا جلا مراسمو په ترڅ کې، د پکتیا، کندهار، کندز، ننګرهار او بلخ ولایتونو د مدارسو د دیني علومو سیالیو پایلې اعلان شوې.
د يادو ولايتونو پوهنې مسئولينو د دغه سياليو د بهير په اړه ګډون والو ته معلومات ورکړل او ويې ويل، د دا ډول سياليو له پيل څخه يې موخه دا ده، چې زمونږ د ټولنې ځوانان او زده کوونکي د بشریت د ستر لارښود او زمونږ د خوږ پیغمبر حضرت محمد(صلي الله علیه وسلم) له سيرت څخه خبر او د هغه تګلاره په خپل ژوند کې عملي کړي.
نورو ويناوالو هم د انسان په فردي او ټولنيز ژوند کې د اسلامي لارښوونو پر فضيلت خبرې وکړې، ديني لارښوونې يې د خلکو سالمې روزنې لپاره خورا مهمې وبللې او د زده کوونکو لپاره يې د دا ډول ښوونيزو پروګرامونو د دوام غوښتنه وکړه.
په پای کې هغه زده کوونکي چې په يادو سياليو کې يې له لومړي تر لسم مقامونو پورې ګټلي وو، د اړوندو ولايتونو پوهنې رياستونو او مسئولينو له لوري ورته ستاینلیکونه او ډالۍ ورکړل شوې.
