د کابل ښار ښوونځيو د "ساینس او ریاضياتو ستوري" سیالیو ممتاز زده کوونکي وستایل شول
څه موده وړاندې د کابل ښار پوهنې ریاست له لوري، د ښوونځیو د زده کوونکو د علمي کچې او استعدادونو د لوړولو په موخه، د کابل ښار اړوند ښوونځیو د ۳۶۵۵ تنو زده کوونکو تر منځ د «ساینس او ریاضي ستوري» په نوم سیالۍ په لاره واچول شوې.
يادې سيالۍ په دريو پړاوونو کې ترسره شوې، چې په پايله کې د صديق الله رښتين لېسې څخه مجيب الله لومړى مقام، د سيد الشهداء لېسې څخه امين الله او د صديق الله رښتين لېسې څخه احمد وهاب په ترتيب سره دويم او درېيم مقامونه خپل کړل.
د کابل ښار پوهنې رئیس حافظ عبدالباسط حقاني، د یادو علمي سياليو ګټونکو ته د مبارکۍ ورکولو په ترڅ کې، د زده کوونکو لپاره په بېلابېلو موضوعاتو د علمي سياليو دایرولو ته په اشارې سره وويل: د دا ډول سياليو پيلول د فکري رشد او استعدادونو په وده کې مهم رول لري او دا ډول سیالۍ کولای شي، زده کوونکي نورو علمي نوښتونو ته وهڅوي.
په یادو مراسمو کې يو شمېر مسئولينو هم د موضوع په باب خبرې وکړې او دا ډول پروګرامونه جوړول يې د زده کوونکو او ځوانانو لپاره ګټور وبلل.
په پای کې د کابل ښار پوهنې ریاست د رئیس او رهبرۍ له لوري، تر لسم مقام پورې ممتاز زده کوونکي په ډالیو تقدیر شول.
