د یو باب ښوونځی الحاقیه دوباره د پوهنې ریاست په ملکیت کې ثبت شوه
د میدان وردګ ولایت جلرېز ولسوالۍ د اوسېدونکو په هلو ځلو او د یاد ولایت د پوهنې ریاست مسئولینو د همکارۍ په پایله کې، د دغې ولسوالۍ د امام اعظم عالي لېسې الحاقیه چې د یو فرصت طلبه شخص تر کنټرول لاندې وه او هلته پکې اوسېده، دوباره د پوهنې ریاست ته وسپارل شوه او د زده کونکو لپاره د استفادې وړ وګرځېده.
د يادونې وړ ده، چې ياده الحاقیه په ١٣٩٠ هجري لمريز کال کې د "بارک" مؤسسې لخوا د يو ميليون او پنځه سوه زره افغانيو په ارزښت جوړه شوې وه، چې په دې وروستيو کې د پوهنې رياست د املاکو د مديريت په همغږۍ په رسمي ډول د پوهنې په ملکیت کې ثبت شوه.
د میدان وردګ ولایت پوهنې ریاست مشرتابه، د پوهنې په برخه کې د ولسونو په ځانګړې توګه د جلرېز ولسوالۍ شریفو اوسېدونکو له همکارۍ او ملاتړ څخه مننه وکړه.
