په هلمند ولايت کې يوه لېسه بيا جوړه او ګټې اخيستنې ته وسپارل شوه
د هلمند ولایت سنګین ولسوالۍ د هاشم سرواني لېسې د اساسي ترمیم چارې بشپړې او د یادې ولسوالۍ د پوهنې مسئولینو، دیني علماوو او مشرانو په ګډون، د یو لړ مراسمو په ترڅ کې ګټې اخیستنې ته وسپارل شوه.
یاد ښوونځی په ۳ اعشاریه ۵ جرېبه ځمکه کې ځمکه کې جوړ شوی او شپږ درسي خونې له نورو اړینو ملحقاتو سره لري، چې د ۴ میلیونه او ۱۱۳ زره ۶۸۶ افغانیو په لګښت د پوهنې په برخه کې د یوه همکار بنسټ له لوري ترمیم او بیا ورغول شو.
د هلمند ولایت پوهنې ریاست د ښوونې او روزنې آمر مولوي محمداسمعيل سعادت، د ماشومانو لپاره د لازمو ښوونيزو آسانتياوو د برابرولو په برخه کې، د ښوونيزو بنسټونو پر اهميت د خبرو پر مهال زياته کړه: د یادې لېسې په بيارغونه کې د درسي خونو رنګول، ، کړکیو نصبول، د ښیښو لګول، د لمریزې برېښنا او د اوبو رسولو سیستم فعالول شامل دي.
نوموړي د ياد خیریه بنسټ له مرستو مننه وکړه او له خلکو يې وغوښتل، تر څو خپل ماشومان ښوونیزو بنسټونو ته د علومو د زده کړې لپاره واستوي.
