د ولایتونو پوهنې خبرونو ته یوه کتنه
بغلان
د بغلان ولايت پوهنې رئیس مولوي محمد نورعزيزي، د یاد ولايت له يو تن سوداګر امين الله رامين سره وکتل او د دغه ولايت د خوست فرنګ ولسوالۍ په مربوطاتو کې یې د يوه منځني ښوونځي د جوړولو په باب تفصیلي خبرې وکړې.
همدارنګه:
د بغلان پوهنې ریاست د یاد ولایت د ښوونځیو له ۴۵ ممتازو زده کوونکو څخه د ارزونې آزموینه واخیسته.
په پلان کې ده چې ګټونکي زده کوونکي به د تحصیلي بورسونو لپاره پوهنې وزارت ته ور وپېژندل شي.
دایکنډي
د دايکنډي د مرکز او ولسواليو پوهنې مسئولينو د همغږۍ غونډه، د یاد ولايت پوهنې رئيس قاري عنايت الله سهار په مشرۍ جوړه شوه.
په یاده ناسته کې د کاري ستونزو د حل، د ښو ښوونیزو خدمتونو د وړاندې کولو او د نظریاتو د تبادلې په ګډون پر بېلابېلو موضوعاتو خبرې وشوې.
بیا هم له یاد ولایت څخه:
د دايکنډي ولايت پوهنې رئيس په یاد ولايت کې د يوه مرستندويه بنسټ د ساحوي دفتر له استازي سره وکتل.
دواړو لورو د وېجاړو شويو ښوونځيو د بيارغونې او يو شمېر نورو همکاريو په اړه تفصیلي خبرې وکړې.
فاریاب
د فاریاب ولایت پوهنې ریاست کاري غونډه، د یاد ولایت د ښوونې او روزنې رئیس په مشرۍ او د پوهنې په برخه کې د سیمه ییزو ادارو د مسئولینو په ګډون جوړه شوه.
