له ولایتونو څخه د پوهنې خبرونو لنډیز
غزني
د پوهنې وزارت د ولایتي چارو د سمون او همغږۍ رئیس الحاج مولوي پاینده محمد تعلیم، غزني ولایت ته د خپل رسمي سفر په ترڅ کې، د پوهنې په برخه کې د همکارو بنسټونو له مسئولینو سره وکتل او د یادو بنسټونو د لارو چارو د ارزونې پرمهال یې، د پوهنې وزارت درۍ کلن ملي پلان له دوی سره شریک کړ.
په ورته مهال نوموړي له هغوی وغوښتل، تر څو خپلې کړنې د پوهنې وزارت له کړنلارې او د غزني له پوهنې ریاست سره په همغږۍ ترسره کړي.
همدارنګه:
د غزني ولایت پوهنې رئیس الحاج مولوي میر نصیر احمد حسیني، د یاد ولایت قرباغ ولسوالۍ ته ولاړ او د یادې ولسوالۍ له ولسوال، امنیې قومندان، استخباراتو آمر او د پوهنې له مسؤلینو سره یې د کتنو پر مهال، له هغوی سره د ستونزو د حل په اړه تفصیلي خبرې وکړې.
پروان
د پروان ولایت پوهنې رئیس مفتي محمد حسن حقاني، د یاد ولایت سرخ پارسای ولسوالۍ ته د یوه کاري سفر په ترڅ کې، د یو شمېر ښوونځیو اداري او تدریسي چارې وڅېړلې او د زده کوونکو د ښوونیزې کچې د ارزونې پر مهال یې د ښوونې په برخه کې دکیفیت پر لوړوالي ټینګار وکړ.
همدارنګه:
د پروان ولایت پوهنې ریاست رهبري پلاوي، د افغانستان د ملي بانک له مسئولینو سره د یوې ناستې په ترڅ کې، د یاد ریاست د کارکوونکو د معاشونو د ورکړې په اړه خبرې وکړې او تفاهم ته ورسېدل.
جوزجان
د جوزجان ولايت پوهنې رئيس الحاج مولوي محمدطاهر جواد، د یاد رياست دڅارنې څانګو له مسئولينو سره غونډه وکړه او په کاري بهیر کې يې د څارنې په ارزښت دخبرو ترڅنګ، له هغوى وغوښتل، تر څو د څارنې د کيفيت د لاښه والي لپاره دې خپلې دندې په احتیاط او صداقت ترسره کړي.
