د پوهنې وزارت د ولایتي چارو د سمون او همغږۍ رئیس د غزني ولایت جاغوري ولسوالۍ د پوهنې له ادارو څخه لیدنه وکړه
د پوهنې وزارت د ولایتي چارو د سمون او همغږۍ رئیس الحاج مولوي پاینده محمد تعلیم غزني ولایت ته د خپل رسمي سفر په ترڅ کې، د یاد ولایت جاغوري ولسوالۍ د پوهنې آمریت له مسؤلینو سره د لیدنې پر مهال، د دغه ریاست له کړنو څخه کتنه وکړه.
نوموړي د یو شمېر دیني مدارسو او ښوونځیو د اداري او تدریسي مېتودونو د ارزونې تر څنګ، د جاغوري ولسوالۍ له عامه کتابتون څخه د لیدنې پر مهال یې د یادې ولسوالۍ د پوهنې دوستو خلکو څخه د دوی د ښوونیزو پروګرامونو د ملاتړ له امله مننه وکړه.
بل پلو د يادې ولسوالۍ د پوهنې مسئولينو د پوهنې وزرات د ولایتي چارو د سمون او همغږۍ د رئیس او ورسره مل پلاوي ورتګ ته ښه راغلاست ووايه او ژمنه يې وکړه، چې په دغه ولايت کې به د پوهنې په پرمختګ او د ستونزو په هواري کې همکاري وکړي.
د يادونې وړ ده، چې ياد پلاوي په غزني ولايت کې د خپل ماموریت پر مهال، په دغه ولايت کې د عصري او ديني زده کړو له يو شمېر بنسټونو څخه ليدنه وکړه او د هغوى د ستونزو د هواري لپاره يې اړوندو مسئولينو ته لازمې سپارښتنې وکړې.
