له ولایتونو څخه د پوهنې خبرونه
لغمان
د لغمان ولایت الینګار ولسوالۍ په ګنده ګل کلي کې یوه سیمه ییزه مدرسه د پوهنې د مسئولینو، دیني علماوو او د سیمې د خلکو په ګډون د یو لړ مراسمو په ترڅ کې پرانیستل شوه.
همدارنګه:
د لغمان ولايت پوهنې رئيس مولوي شاه جهان ساجد، د ياد ریاست له مرکزي څانګو څخه څارنه وکړه او له کارکوونکو يې وغوښتل، تر څو له مراجعينو سره ښه چلند وکړي او د ورسپارل شويو دندو په ترسره کولو کې صادق او رښتيني واوسي.
کابل
د کابل ولایت ګلدرې ولسوالۍ د پوهنې آمریت له لوري د یادې ولسوالۍ د ۳۱۳ ښوونځیو له زده کوونکو څخه د اسلام د ستر پیغمبر حضرت محمد (صلي الله علیه وسلم) سیرت په اړه رقابتي آزموینه واخیستل شوه.
د یادو سیالیو د ترسره کولو موخه، د رسول الله (صلي الله علیه وسلم) له سیرت، نیکو او غوره اخلاقو سره د ځوانانو آشنا کول ؤ.
د یو بل خبر له مخې:
د کابل ښار پوهنې رئیس قاري عبدالباسط حقاني، د یاد ښار په درېیمه ښوونیزه ناحیه کې له یوه ښوونیز مرکز څخه څارنه وکړه او له مسئولینو یې وغوښتل، تر څو خپل فعالیتونه د ښوونیزې کړنلارې له مخې ترسره کړي.
سمنګان
د سمنګانو ولایت پوهنې ریاست د همغږۍ غونډه د الحاج مولوي نصرت الله فیضاني په مشرۍ د ښوونځیو د آمرینو او د شوراوو د غړو په ګډون جوړه شوه.
د یادې غونډې د جوړېدو موخه د پوهنې د وضعیت څېړل، د نیمګړتیاوو په ګوته کول او د ښوونکو د ظرفیت لوړول ؤ.
