د پوهنې وزارت د ولایتي چارو د سمون او همغږۍ رئیس د غزني ولایت پوهنې ریاست له ښوونیزو ادارو څخه لیدنه وکړه
د پوهنې وزارت د ولایتي چارو د سمون او همغږۍ رئیس الحاج مولوي پاینده محمد تعلیم او ورسره مل پلاوي غزني ولایت ته د یوه رسمي سفر په ترڅ کې، د یاد ولایت له پوهنې رئیس او مشرتابه سره د لیدنې پر مهال، دناوې ولسوالۍ د پوهنې آمریت کړنې وڅېړلې.
دغه راز یاد پلاوي د یو شمېر دیني مدارسو او ښوونځیو اداري او تدریسي طریقې هم وارزولې او د ښوونیزو چارو د لا ښه والي او د درسي کیفیت د لوړولو په موخه یې اړوندو مسئولینو ته لازمې لارښوونې او مشورې ورکړې.
له بلې خوا د غزني ولایت پوهنې ریاست مسئولینو د پوهنې وزارت د ولایتي چارو د سمون او همغږۍ ریاست پلاوي ته ښه راغلاست ووایه او ژمنه یې وکړه، چې په یاد ولایت کې به د پوهنې د ودې او د ستونزو په هواري کې صادقانه هڅې وکړي.
