د پوهنې وزارت د معیاري آزموینو رئیس فاریاب ولایت ته سفر وکړ
د پوهنې وزارت د معیاري آزموینو رئیس مولوي شمس الرحمن حماس او ورسره مل پلاوی، د ښوونکو او استادانو د تدریسي وړتیاوو د ارزونې په موخه فاریاب ولایت ته په یو رسمي سفر ولاړ.
په هغه کتنه کې چې یاد پلاوي د فاریاب ولایت د پوهنې له رئیس او مشرتابه سره درلوده، په پیل کې د پلاوي مشر دغه ولایت ته د خپل سفر موخه تشرېح او ورپسې د یاد ولایت مسئولینو د پوهنې وزارت پلاوي ته د خپلو لاس ته راوړنو او دندو په اړه لنډ راپور وړاندې کړ، چې د پلاوي له لوري په ښه توګه و ارزول شو.
همدارنګه د فاریاب پوهنې رئیس د پوهنې وزارت له پروګرامونو څخه هرکلی وکړ او د پلي کولو په برخه کې یې خپل چمتووالی اعلان کړ.
د غه راز نوموړي پلاوي ته ډاډ ورکړ، چې د پوهنې وزارت د لارښوونو او پلانونو د پلي کولو په برخه کې به کوټلي ګامونه پورته کړي.
له بلې خوا د پوهنې وزارت د معیاري آزموینو رئیس د فاریاب ولایت د پوهنې ریاست له رهبرۍ څخه د مننې په ترڅ کې وویل: د پوهنې وزارت رهبري د هېواد د پوهنې دوست او غیور ملت سره ژمنه کوي چې د متوازنو ښوونیزو خدمتونو د پراختیا په لاره کې به جدي هلې ځلې کوي.
د يادونې وړ ده، چې اوسمهال د هېواد په پنځو شمالي ولايتونو کې د ښوونکو د وړتياوو د ارزونې لړۍ روانه ده.
