د پوهنې وزارت د ولایتي چارو د انسجام رئیس د زابل ولایت پوهنې ریاست له کارکوونکو سره وکتل
د پوهنې وزارت د ولایتي چارو د انسجام رئیس الحاج مولوي پاینده محمد تعليم په مشرۍ پلاوي، چې د اسلامي زده کړو معينيت او د پلان رياست يو شمېر کارپوهانو يې هم ملتيا کوله، د يو لړ رسمي چارو د ترسره کولو په موخه زابل ولايت ته سفر وکړ.
په هغه غونډه کې چې په همدې موخه جوړه شوې وه، د زابل ولایت د پوهنې ریاست پر رئیس الحاج مولوي ګل ولي سربیره د ياد رياست مرستيالانو او کارکوونکو هم حضور درلود.
غونډه د قرآن عظیم الشان د مبارکو آیتونو په تلاوت سره پیل شوه، ورپسې د یاد ولایت د پوهنې رئیس زابل ولایت ته د ورغلي پلاوي هرکلی وکړ او د یاد ریاست د پلانونو او پروګرامونو په اړه یې پلاوي ته معلومات ورکړل.
په ورته مهال، د پوهنې وزارت د ولایتي چارو د انسجام رئيس ياد ولایت ته د پلاوي د سفر موخه څرګنده کړه او ویې ویل، چې د پوهنې وزارت د خپلو دندو او کړنو د لاښه ترسره کولو په موخه، درې کلن عملیاتي پلان ترتیب او د هغه د پلې کولو په موخه یې د ولايتونو پوهنې رياستونو د مسئولینو او کارپوهانو نظرونه په جلا توګه مطرح کړل.
دغه راز نوموړي هیله څرګنده کړه، چې دوی هم د پوهنې په برخه کې په دقیقه څېړنه او تحلیل سره په یاد پلان کې اصلاحي نظریات شامل کړي.
همدارنګه پلاوي په یو شمېر نورو مواردو کې هم د پوهنې کارکوونکو ته لازمې لارښوونې وکړې.
په پای کې د زابل پوهنې رئیس له پلاوي سره یو لړ وړاندیزونه او ستونزې شریکې کړې، چې د ولايتي چارو د انسجام رئيس له لوري يې د همکارۍ ژمنه وشوه.
