د پوهنې وزارت د ولایتي چارو د انسجام رئیس د غزني ولایت له پوهنې رئیس سره وکتل.
د پوهنې وزارت د ولایتي چارو همغږي رئیس الحاج مولوي پاینده محمد تعلیم د غزني ولایت د پوهنې رئیس مولوي میرنصیر احمد حسیني سره وکتل او په ياد ولایت کې یې د پوهنې پر مهمو مسایلو خبرې وکړې.
د هغه سفر په ترڅ کې چې د ولايتي چارو د همغږي رئيس په مشرۍ پلاوي غزني ولايت ته سفر درلود، په پيل کې یاد پلاوي د خپل سفر موخه تشریح کړه او ويې ويل؛ د پوهنې وزارت د هېواد د پوهنيز نظام د لاپياوړتيا په هدف دری کلن ښوونيز پلان جوړ کړی او غواړي د مسئولينو او کارپوهانو په نظرونو سره د ياد پلان په پلې کولو کې لازمه همغږي را منځته کړي.
نوموړي د ياد رياست له کارکوونکو او مسئولينو څخه وغوښتل، تر څو په دې برخه کې خپله ملي ونډه په ایماندارۍ او مسئوليت سره ادا کړي او ياده طرحه د کره معلوماتو او هراړخيزو نظرياتو په وړاندې کولو سره لا پياوړې کړي.
هغه زیاته کړه؛ لکه څنګه چې د پلان له سرلیک څخه څرګندېږي، یاد پلان یو ملي سند دی، چې د مرکز او ولایتونو د پوهنې ریاستونو د ټولو مسئولینو، علماوو، ملي شخصیتونو او مخورو د نظریاتو پر بنسټ ترتيب شوى دى.
په پای کې د غزني ولایت پوهنې رئیس له پوهنې وزارت سره د پوهنې ریاست پر همکارۍ د ټینګار ترڅنګ، د یاد پلان په ترتیب او پلې کولو کې د همکارۍ ژمنه وکړه.
